TOШКЕНТ, 21 апр — Sputnik. Ўзбекистон ва Саудия Арабистони билан ҳамкорликда "Ўзбек тили ва маданияти" маркази очилиши кутилмоқда. Бу ҳақда "Дунё" АА хабар берди.
Ўзбекистон бош консули Сирожиддин Шамсутдинов Саудия Арабистони Ташқи ишлар вазирлиги Жидда бўлими директори Фарид бин Саад аш-Шаҳрий билан учрашди.
Қайд этилишича, учрашув аввалида Фарид бин Саад аш-Шаҳрий мамлакат бош консулини янги лавозимга тайинлангани билан табриклаб, Саудия ТИВ раҳбари томонидан имзоланган консуллик экзекватуранинг асл нусхасини тақдим этди.
У, шунингдек, Саудия Арабистони ТИВ Жидда бўлими Ўзбекистон бош консулхонасини барча масалаларда қўллаб-қувватлашини билдирди.
“Томонлар Бош консулхона қошида "Ўзбек тили ва маданияти" марказини ташкил этиш имкониятлари хусусида фикр алмашилдилар. Бундан ташқари, "Ҳаж-2025" мавсумини юқори даражада ташкил этиш, хусусан Ўзбекистондан келадиган бўлажак ҳожиларга муносиб шароитларни яратиш масалалари муҳокама қилинди”, — дейилган хабарда.
Шунингдек, Ўзбекистон ва Саудия Арабистони ўртасида савдо-иқтисодий, сайёҳлик, илм-фан ва маданият соҳаларида бўлиб ўтадиган халқаро кўргазма, фестиваль ва конференциялар ҳақида ўзаро маълумотлар алмашиш ҳамда вакиллар иштирокини таъминлаш муҳимлиги таъкидланди.