TOШКЕНТ, 16 апр — Sputnik. Ўзбекистонликлар тез орада АТТО транспорт карталаридан Қозоғистон ва Қирғизистонда ҳам фойдаланишлари мумкин бўлади. Бу ҳақда Sputnik Ўзбекистон мухбирига АТТО асосчиси ва бошқарувчи ҳамкори Тимур Азадов маълум қилди.
“Биз технологик ҳамкоримиз билан биргаликда жамоат транспорти операторлари ўртасида "Global Payment Network" лойиҳасини ишга туширдик. Ушбу лойиҳа доирасида АТТО Қирғизистон ва Қозоғистон транспорт операторлари билан ўзаро интеграция бўйича фаол иш олиб бормоқда. Умид қиламизки, яқин келажакда АТТО транспорт карталари фойдаланувчилари ушбу мамлакатларнинг жамоат транспортида тўлов қилишлари мумкин бўлади”, — деди Тимур Азадов.
Унинг сўзларига кўра, ушбу қулайлик Ўзбекистонга келган қирғизистонликлар учун ҳам яратилади.
“Биз ўзаро интеграцияга умид қиламиз – Қирғизистон операторининг Бишкекда жойлашган транспорт карталаридан фойдаланувчилар Ўзбекистонда ўз карталаридан тўловлар учун фойдаланишлари мумкин бўлади”, — дея қўшимча қилди у.
Бундан ташқари, Туркия, БАА ва Саудия Арабистонида ҳамкорликни кенгайтириш ишлари олиб борилмоқда.
Маълумот учун, АТТО Марказий Осиёдаги энг йирик микротўлов операторларидан бири. У беш йил ичида 1,25 миллиарддан ортиқ транзакцияларни амалга оширди. Бугунги кунда 13 та ҳудуд АТТО тизимига уланган, 2 миллиондан ортиқ транспорт карталари чиқарилган, 1,3 миллион фойдаланувчи турли хизматлар учун тўловни амалга ошириш учун АТТОни танлаган.