Нукус шаҳрида бўлиб ўтган Орол маданияти саммити доирасида И. В. Савицкий номидаги Қорақалпоғистон Республикаси давлат санъат музейида янги кўргазма очилди. У “Игорь Савицкий олами: ашёлар, фигуралар, масканлар” деб номланади ва музей асосчиси таваллудининг 110 йиллигига бағишланади.
“Ушбу кўргазмада 350 та асар тақдим этилган бўлиб, улардан 180 таси бадиий – рангтасвир ва графика, қолганлари эса амалий санъат объектлари ҳамда археологик топилмалар. Бу ерда Александр Волков, Ўрол Тансиқбоев, Оганес Тативасян, Виктор Уфимцев, Александр Николаев ва бошқа рассомларнинг асарлари тақдим этилган. Кўргазма доирасида француз ва маҳаллий мутахассислар томонидан 40 тадан ортиқ асар реставрация қилинди”, — дея таъкидлади Ўзбекистон Маданий мерос агентлиги Музейларни мувофиқлаштириш бошқармаси бошлиғи Бобур Саёмов.
Кўргазма доирасида намойиш этилаётган асарларнинг илмий каталоги чоп этилди. Кўргазмада кўплаб рус авангард рассомларининг расмлари намойиш этилади.
"Бизнинг музей рус авангард ва пост-авангардининг аҳамияти ва миқдори бўйича Россия музейидан кейин иккинчи ўринда туради. Бу ерда номлари Россияда ҳам маълум бўлмаган кўплаб рассомлар намойиш этилган. Игор Савицкий туфайли бу асарлар ва кўплаб россиялик рассомларнинг номлари сақланиб қолинди", - деди И.В. Савицкий номидаги Қорақалпоғистон давлат санъат музейи директори Гулбаҳор Изентаева.
Кўргазма Ўзбекистон маданият ва санъатини ривожлантириш жамғармаси томонидан ташкил этилди.
Батафсил Sputnik видеосида.