ТОШКЕНТ, 9 апр – Sputnik. 2024 йил якунлари бўйича Евроосиё иқтисодий иттифоқи (ЕОИИ) давлатларида давлат бошқаруви секторининг қарзи ЕОИИ тўғрисидаги шартномада белгиланган чегаралар доирасида бўлди. Бу ҳақда Евроосиё иқтисодий комиссиясининг (ЕИК) матбуот хизмати хабар берди.
Бир қатор мамлакатларда ялпи ички маҳсулотга нисбатан қарз даражаси пасайган: Қирғизистонда – 13,1 фоизгача, Россияда – 13,6 фоизгача. Арманистон ва Қозоғистонда ички қарзларнинг ортиши ҳисобига қарзнинг ЯИМга нисбати мос равишда 48,2% ва 23,2% гача ошган.
Иттифоқнинг аксарият мамлакатларида давлат бошқаруви секторининг бюджет баланси ҳам белгиланган қийматлар доирасида шаклланди: Қозоғистон ва Россияда - мос равишда ЯИМнинг 0,7% ва ЯИМнинг 1,2% ҳажмида ўртача тақчиллиги, Қирғизистонда - ЯИМнинг 3,5% миқдорида бюджет профицити.
Бюджетлар, биринчи навбатда, солиқ ва солиқдан ташқари тушумларнинг ўсиши ҳисобига қўллаб-қувватланди. Арманистон бундан мустасно бўлиб, мамлакатда бюджет тақчиллиги белгиланган қийматдан ошиб, ялпи ички маҳсулотнинг 3,5 фоизини ташкил этди, бу аҳолини ижтимоий қўллаб-қувватлашга харажатларнинг кўпайиши ҳисобига содир бўлди.