ТОШКЕНТ, 8 апр – Sputnik. Ўзбекистон президенти Шавкат Мирзиёев Парламентлараро иттифоқ бош котиби Мартин Чунгонгни "Дўстлик" ордени билан тақдирлади. Тақдирлаш маросими давлат раҳбарининг Парламентлараро иттифоқ раиси Тулия Эксон ва Мартин Чунгонг билан учрашувида бўлиб ўтди.
Мартин Чунгонг ҳамкорликни ривожлантириш ва парламент дипломатиясини самарали илгари суришга қўшган катта ҳиссаси учун бу орденга лойиқ кўрилган.
Шу кунларда 181 та миллий парламент ва 15 та минтақавий уюшмани бирлаштирган Иттифоқнинг Ассамблеяси илк марта Марказий Осиё минтақасида – Тошкентда – бўлиб ўтмоқда.
Ўзбекистон 1992 йилда Парламентлараро иттифоққа қўшилган, 2006 йилда аъзоликни вақтинча тўхтатган ва 2017 йилда иштирокини қайта тиклаган. Бугунги кунда унинг ижро этувчи тузилмаларида тўлақонли қатнашмоқда.