ТОШКЕНТ, 10 мар – Sputnik. Евроосиё иқтисодий комиссияси (ЕИК) Бирлашган Миллатлар Ташкилоти (БМТ) Статистика комиссиясининг 56-сессиясида кузатувчи сифатида иштирок этди. Бу мақом тўғрисидаги қарор 4 март куни Нью-Йоркда бўлиб ўтган мажлисда қабул қилинди. Унда ЕИК интеграция ва макроиқтисодиёт вазири Элдар Алишеров иштирок этди.
ЕИК вазири янада конструктив ҳамкорликка тайёрлигини таъкидлади.
“Комиссия БМТнинг Статистика комиссияси билан ҳамкорликни кенгайтириш ва Барқарор ривожланиш мақсадларига (БМР) эришиш кўрсаткичлари бўйича мутахассислар гуруҳлари доирасида ишлашга қизиқиш билдиради”, - деди Алишеров.
Унинг сўзларига кўра, комиссия БМТ Статистика комиссияси ишларида фаол иштирок этиш, глобал статистик тизимни ривожлантиришга ҳисса қўшиш ва халқаро ҳамкорлар билан алоқаларни мустаҳкамлаш ниятида.
Статистика комиссияси сессияси доирасида Алишеров Швейцариянинг Федерал статистика бошқармаси бош директори Жорж-Симон Улрих билан музокаралар ўтказди. Томонлар статистика соҳасидаги ўзаро ҳамкорликнинг истиқболларини муҳокама қилишди.
БМТнинг Статистика комиссияси 1947 йилда ташкил этилган ва глобал статистик тизимнинг энг олий органидир. У БМТга аъзо мамлакатларнинг статистика органлари раҳбарларини бирлаштиради ва статистик стандартларни белгилаш, халқаро даражада келишилган концепциялар ва усулларни ишлаб чиқиш, шунингдек, уларни миллий ва халқаро даражада жорий этиш учун масъулдир.