ТОШКЕНТ, 21 фев — Sputnik. АҚШнинг республикачи сенаторлари Қўшма Штатлар БМТ билан Нью-Йоркдаги штаб-квартираси ҳақида тузилган келишувдан чиқишни таклиф қилмоқда.
Гап 1947 йилда имзоланган БМТ штаб-квартирасининг Нью-Йорк шаҳрида жойлашиши ҳақидаги шартнома ҳақида кетмоқда. Унда БМТ ҳудуди чегаралари аниқ белгиланган бўлиб, ушбу ҳудудда БМТ Бош Ассамблеяси тартиб-қоидалари маҳаллий қонунлардан устун туриши ва яна бир қатор шартлар белгиланган.
Жума куни сенаторлар АҚШ ва БМТ орасида имзоланган қатор келишувлардан чиқишини талаб қилувчи қонун лойиҳасини тақдим этди. Қонун лойиҳаси Бирлашган Миллатлар Ташкилоти ва унинг агентликларини молиялаштиришни қисқартиради ва Сенат розилигисиз ташкилотга қайта киришни тақиқлайди. Бундан ташқари, АҚШнинг БМТ тинчликпарвар миссияларида иштирок этишига ҳам тақиқ жорий этилади.
АҚШ президенти Доналд Трамп 4 февраль куни АҚШнинг БМТдаги иштирокини қайта баҳолаш тўғрисидаги фармонни имзолаб, ташкилот ёмон бошқарилаётгани ва ўз вазифасини бажармаётганини айтган эди.
Аввалроқ Трамп мамлакатнинг ЖССТдан чиқиши ҳақидаги буйруқни имзолаган эди. Янги маъмурият ЖССТ самарасиз, сиёсий таъсир остида ва Қўшма Штатлардан жуда кўп маблағ талаб қилади, деб ҳисоблайди.