TOШКЕНТ, 3 фев — Sputnik. Евроосиё иқтисодий комиссияси (ЕИК) иқтисодий ўсиш учун шароитларни яхшилашда давом этади. Бу ҳақда ЕИК ҳайъати раиси Бахитжан Сагинтаев комиссия ташкил топганининг 13 йиллиги муносабати билан йўллаган табригида маълум қилди.
Унинг қайд этишича, 2012 йилда ташкил этилганидан буён ЕИК аъзо мамлакатлар билан биргаликда Евроосиё иқтисодий иттифоқи (ЕОИИ) асосларида белгиланган ва Евроосиё иқтисодий интеграциясини изчил ривожлантиришга қаратилган фундаментал тамойилларни амалга ошириш устида иш олиб бормоқда.
“Комиссия ўз ишида “бешлик” давлат фуқароларининг турмуш даражасини яхшилашга кўмаклашиш мақсадига амал қилишда, шунингдек, Иттифоқ доирасида иқтисодий ўсиш учун шароитларни яхшилашда давом этади”, — деди у.
Унинг айтишича, ЕОИИ доирасида мустаҳкам меъёрий-ҳуқуқий база яратилди, иқтисодиётнинг турли тармоқларида узоқ муддатли устуворликлар белгиланди, тадбиркорлик ва фуқароларнинг меҳнат фаолиятини амалга ошириши учун қулай шароитлар мавжуд.
Евроосиё иқтисодий комиссияси Евроосиё иқтисодий иттифоқининг доимий бошқарув органи ҳисобланади. У 2012 йил 2 февралда иш бошлаган. Комиссиянинг асосий мақсади ЕОИИ фаолияти ва ривожланиши учун шарт-шароитларни таъминлаш ҳамда интеграцияни янада ривожлантириш бўйича таклифлар ишлаб чиқишдан иборат.
Ҳозирги вақтда ЕИКда бешта давлат вакиллари бор: Арманистон, Беларусь, Қозоғистон, Қирғизистон ва Россия. ЕИК миллий бошқарув органи мақомига эга, унинг қарорлари Евроосиё иқтисодий интеграцияси лойиҳасида иштирок этувчи мамлакатлар манфаатларидан келиб чиқади. Комиссия қарорлари ЕОИИга аъзо давлатлар ҳудудида мажбурийдир.