ТОШКЕНТ, 22 окт — Sputnik. Ўзбекистон Россиянинг "Ozon" бозори билан ишлайдиган тадбиркорларни ўқитиш ва қўллаб-қувватламоқчи. Бу ҳақда Савдо-саноат палатаси хабар берди.
Ўзбекистон Савдо-саноат палатаси раиси Даврон Вахабов “Ozon” компанияси вакиллари билан учрашди. Учрашувда “Ўзтўқимачиликсаноат” уюшмаси ва “Ўзэлтехсаноат” уюшмаси раисларининг ўринбосарлари, тўқимачилик ва электротехника саноатида фаолият юритаётган ишбилармон доиралар вакиллари ҳам иштирок этди.
Учрашувда палата ҳузурида 2024 йил октябрь ойида электрон тижоратни ривожлантиришга кўмаклашиш, жумладан, маҳаллий ва хорижий маркетплейслар билан ҳамкорлик қилиш мақсадида ташкил этилган "CHAMBER-TRADE LINK" компанияси тақдимоти бўлиб ўтди.
“Томонлар ўзбекистонлик тадбиркорлар учун маркетплейслар билан ишлашни ўзлаштиришга қаратилган ўқув дастурини ишлаб чиқиш имкониятларини муҳокама қилдилар. Семинарлар логистикани оптималлаштириш, стратегик маҳсулотларни илгари суриш ва халқаро ҳамкорлар билан самарали ҳамкорлик қилиш каби мавзуларни ўзлаштиришни ўз ичига олади”, — дейилади хабарда.
Шунингдек, Савдо-саноат палатаси тадбиркорларни экспортдан олдин молиялаштиришда ҳар томонлама қўллаб-қувватлашга тайёрлигини билдирди.
Бу транспорт харажатларининг бир қисмини субсидиялашни ўз ичига олади, товарларни экспорт қилишда логистика харажатларини сезиларли даражада камайтиради. Маҳсулотларни хорижда сақлаш харажатлари ҳам кўзда тутилган бўлиб, бу тадбиркорларга таъминот ва ташқи бозорларда яшувчанлигини янада самарали бошқариш имконини беради.