TOШКЕНТ, 2 окт — Sputnik. Эроннинг Исроил ҳудудига ракета ҳужуми Теҳрон томонидан ўзини ҳимоя қилиш ҳаракати бўлиб, БМТ Низомининг 51-моддасига мувофиқ, Эрон томони фақат ҳарбий базалар ва хавфсизлик билан боғлиқ объектларни нишонга олган. Бу ҳақда Эрон ташқи ишлар вазири Аббос Ароқчи Европа ва бошқа мамлакатлардаги ҳамкасблари билан телефон орқали мулоқоти чоғида маълум қилди, деб ёзмоқда РИА Новости.
“Эрон Ислом Республикаси фақат БМТ Низомининг 51-моддасига биноан қонуний мудофаа қилиш ҳуқуқидан фойдаланган ва фақат ҳарбий базалар ва хавфсизликни нишонга олган”, — дея вазирнинг сўзларидан иқтибос келтирди Эрон ташқи ишлар вазирлигининг расмий Telegram-канали.
Ташқи ишлар вазирлиги маълумотларига кўра, Ароқчи Буюк Британия, Франция, Германия ва бошқа бир қанча давлатлардаги ҳамкасблари билан телефон орқали мулоқот қилган, улар билан Эроннинг Исроилга қарши ракета ҳужуми, шунингдек, Ғазо сектори ва Ливандаги кескинликни муҳокама қилган.
Эрон ташқи ишлар вазири Ислом Республикаси “Исмоил Ҳаниянинг ўлимига сабаб бўлган Исроил теракти” ҳамда Тел-Авивнинг Ғазо ва Ливанда ҳарбий можарога ундаши фонида икки ой давомида вазминлик кўрсатганини таъкидлади.
Эрон Ташқи ишлар вазирлиги раҳбари суҳбат якунида яна бир бор барча давлатларни Исроилнинг Яқин Шарқ минтақасида, айниқса Ғазо сектори ва Ливанга нисбатан зарбалари ва кучайишига йўл қўймаслик учун ўт очишни тўхтатиш учун ҳаракат қилишга чақирди.
Аввалроқ Ароқчи Эрон акцияси якунланганини маълум қилганди. Шу билан бирга, у Тел-Авивнинг янги провокациялари Теҳрон томонидан янада кескинроқ жавоб беришини таъкидлади.
Сешанба куни кечқурун Исроил ҳарбийлари Эрондан ракета учирилгани ҳақида хабар беришди. Яҳудий давлати бош вазири девонининг маслаҳатчиси Дмитрий Генделман айтганидек, гап 180 тага яқин снарядлар ҳақида кетмоқда, унинг сўзларига кўра, уларнинг аксарияти тутиб олинган. Шунингдек, у Тел-Авив уларга зарар етказган ҳар бир кишига жавоб беришини ваъда қилди.
Шу билан бирга, Эрон ОАВ хабар беришича, учирилган ракеталарнинг камида 80 фоизи Исроилдаги нишонларни урган. Ислом инқилоби қўриқчилари корпуси таъкидлаганидек, бугунги ҳужум "Ҳизбуллоҳ" бош котиби Ҳасан Насруллоҳ, ҲАМАС сиёсий бюроси раҳбари Исмоил Ҳания ва Қудс кучлари қўмондони Аббос Нилфорушаннинг ўлимига жавоб бўлди.
Бундан ташқари, ахборот агентликларининг қайд этишича, Эрон Ислом инқилоби қўриқчилари корпуси (ЭИИҚК, қуролли кучларнинг элита бўлинмалари) Исроилга ҳужум қилиш учун биринчи марта гипертовушли ракеталардан фойдаланган.