ТОШКЕНТ, 23 сен — Sputnik. Ботир Зоҳидов камбағалликни қисқартириш ва бандлик вазири лавозимига тасдиқланди, деб ёзмоқда президент матбуот котиби Шерзод Асадов ўзининг Telegram-каналида.
Президент Шавкат Мирзиёев раислигида қурилиш индустрияси ва қурилиш материаллари ишлаб чиқаришни ривожлантириш масалаларига бағишланган йиғилиш бўлиб ўтди.
Президент сменил министра занятости и сокращения бедности
© Пресс-служба президента Узбекистана
Кун тартибидаги асосий масалаларга ўтишдан олдин давлат раҳбари камбағалликни қисқартириш ва аҳоли турмуш фаровонлигини ошириш масалаларига тўхталди.
Президент куни кеча имзолаган 2 та муҳим ҳужжатга мувофиқ, шу йилнинг ўзида 500 минг, келгуси йилда яна 1 миллион одамни камбағалликдан чиқаришга қаратилган “Камбағалликдан фаровонлик сари” дастури бошланмоқда.
Бандлик вазирлигининг ҳозирги иш юритиши билан бу марраларга эришиб бўлмаслиги қайд этилди.
Ботир Зохидов (в центре)
© Пресс-служба президента Узбекистана
“Шу муносабат билан Ботир Зоҳидов камбағалликни қисқартириш ва бандлик вазири лавозимига тасдиқлангани маълум қилинди”, — дейилади хабарда.
Бу вазирлик фаолияти ҳам мутлақо бошқача бўлиши кўрсатиб ўтилди. Маҳаллабай агентлиги тугатилиб, унинг барча вазифалари ҳамда ҳоким ёрдамчилари Камбағалликни қисқартириш ва бандлик вазирлигига ўтади.
Давлат раҳбари мамлакат олдида ташқи меҳнат миграцияси соҳасида очилаётган улкан имкониятларни тўлиқ ишга солиш зарурлигини таъкидлади.
Бехзод Мусаев
© Пресс-служба президента Узбекистана
“Шу муносабат билан Ташқи меҳнат миграцияси агентлиги Ҳукумат бўйсунувига ўтказилади ва Беҳзод Мусаев унга раҳбар этиб тайинланади”, — деб ёзади Асадов.
Агентликка фуқароларнинг хориждаги юқори даромадли меҳнат бозорларига кириши бўйича бошланган ишларни жадаллаштириш топширилди. Ҳокимлар ва хориждаги дипломатик ваколатхоналар хорижда меҳнат қилаётган юртдошлар тақдири учун агентлик билан тенгма-тенг жавобгар бўлиши белгиланди.