TOШКЕНТ, 29 авг — Sputnik. Капитан Баҳодир Жалолов ва капитан Ҳасанбой Дўсматовга навбатдан ташқари подполковник ҳарбий унвони муддатидан олдин берилди. Бу ҳақда Миллий гвардия матбуот хизмати хабар берди.
Уларга ушбу унвон Миллий гвардия қўмондони томонидан тантанали равишда топширилди.
“Ўзбекистон Республикаси Миллий гвардияси шахсий таркиби орасида ўзларининг садоқати, жасорати ва мардлиги билан ўрнак бўлиб, устоз-шогирд анъаналарига мувофиқ ҳарбий хизматчилар ва ёшлар орасида спортни тарғиб қилишга қўшган улкан ҳиссаси учун капитан Жалолов Баҳодир Исомиддин ўғли ва капитан Дўсматов Ҳасанбой Маруфжон ўғлига Ўзбекистон Республикаси Қуролли Кучлари Олий бош қўмондонининг рухсати билан навбатдан ташқари подполковник ҳарбий унвони муддатидан олдин берилди”, — дейилади хабарда.
Шунингдек, бокс бўйича Ўзбекистон терма жамоаси бош мураббийи Тўлқин Қиличев, Ўзбекистон терма жамоаси катта мураббийи Раҳматжон Рўзиохунов ҳамда бокс бўйича Ўзбекистон аёллар терма жамоаси бош мураббийи, Миллий гвардия Ихтисослаштирилган ўқув маркази катта ўқитувчиси подполковник Элшод Расулов “Миллий гвардия фидойи ходими” кўкрак нишони билан тақдирланди.
Баҳодир Жалолов ва Ҳасанбой Дўсматовга муддатидан олдин подполковник унвони берилди
© Национальная гвардия Узбекистана
Эслатиб ўтамиз, Парижда ўтган Олимпия ўйинларида 8 та олтин медални Диёра Келдиёрова, Ҳасанбой Дўсматов, Улуғбек Рашитов, Асадхўжа Муйдинхўжаев, Лазизбек Муллажонов, Абдумалик Халоков, Разамбек Джамалов, Баҳодир Жалолов, 2 та кумуш медални Акбар Жўраев, Светлана Осипова, 3 та бронза медалини Алишер Юсупов, Музаффар Тўрабоев, Ғуломжон Абдуллаев қўлга киритишди.