TOШКЕНТ, 21 авг — Sputnik. Тошкентда Россия тиббий-генетик илмий марказининг филиали ташкил этилади. Бу ҳақда ҳукуматнинг тегишли қарори қабул қилинди.
Фанлар академиясининг Иммунология ва инсон геномикаси институти ҳамда Россиянинг “Академик Н.П. Бочков номидаги тиббий-генетик илмий маркази” Федерал давлат бюджети илмий муассасаси ўртасида битим имзоланди.
Ҳужжат Ўзбекистонда Тошкент тиббий-генетик илмий маркази - "Академик Н.П. Бочков номидаги тиббий-генетик илмий маркази” Федерал давлат бюджети илмий муассасасининг бўлинмасини ташкил этишни назарда тутади.
Бўлинманинг асосий вазифалари:
Тиббий генетика соҳасида янги билимларни ўзлаштиришга қаратилган фундаментал, қидирув ва амалий илмий тадқиқотларни амалга ошириш;
Халқаро талаб ва стандартларга мувофиқ юқори малакали илмий ва тиббий кадрлар тайёрлаш тизимида иштирок этиш;
Фан ва таълимнинг халқаро илмий-тадқиқот ва таълим йўналишига интергациялашувга кўмаклашиш.