TOШКЕНТ, 20 авг — Sputnik. Ер ости бойликларини ўзлаштиришга тадбиркорлар кенг жалб этилади. Бу ҳақда Нукусда бўлиб ўтаётган президент Шавкат Мирзиёевнинг тадбиркорлар билан очиқ мулоқотида маълум қилинди, деб ёзади давлат раҳбари матбуот котиби Шерзод Асадов.
Мулоқтда ер ости бойликларини ўзлаштиришга тадбиркорларни кенг жалб этиб, ишлаб чиқаришни кўпайтириш муҳимлиги таъкидланди.
Айтилишича, шу йилнинг ўзидаёқ 150 тадан ортиқ кон ва майдонлар тадбиркорларга сотилди.
“Йил якунигача яна 300 та кон ва майдонлар тадбиркорларга таклиф қилинади”, — дейилади хабарда.
Шунингдек, қурилишда қум-шағалга эҳтиёжни қоплаш мақсадида 110 миллион куб метр захирали 172 та кон ҳам тадбиркорлик учун ажратилади.
Қайд этилишича, йилига 250 триллион сўмдан зиёд давлат харидлари амалга оширилмоқда. Шу боис, давлат харидларида маҳаллий маҳсулотлар улушини ошириш вақти келди.
Келгуси йилги давлат инвестиция дастуридаги ҳар бир лойиҳа бўйича маҳаллий маҳсулотлар улуши қанча бўлиши аниқ белгиланади. Давлат харидида энди маҳаллий маҳсулот улушини ошириш рағбатлантирилади.
Жумладан, энергетика, нефтгаз, кимё, металлургия, темир йўл каби тармоқлардаги йирик корхоналар 2-3 йиллик буюртмаларини кооперация порталига олдиндан жойлаштиради.
Маҳаллий корхоналар эса ушбу буюртмалар асосида янги турдаги маҳсулотларни ишлаб чиқаришни йўлга қўяди. Уларнинг лойиҳаларига дастлабки босқичда 100 миллион доллар йўналтирилади.