ТОШКЕНТ, 8 авг — Sputnik. Курск вилоятидаги вазият 6 август куни эрталаб минг кишигача бўлган Украина бўлинмалари Суджа тумани ҳудудининг бир қисмини эгаллаб олишга урингач, кескинлашди.
Россия Қуролли кучлари Бош штаби бошлиғи Валерий Герасимов президент билан учрашувда Россия армияси Украина Қуролли кучларининг Курск вилоятида юришини тўхтатганини маълум қилди.
Россия ҳарбийларининг ҳаракатлари натижасида душман 315 кишисини йўқотди, шу жумладан, камида юз киши ҳалок бўлди ва 215 киши яраланди, 54 та зирҳли техника, жумладан, 7 та танк йўқ қилинди, деди Герасимов.
“Операция душманни мағлуб этиш ва давлат чегарасига етиб бориш билан якунланади”, — деди Бош штаб бошлиғи.
Вилоят губернатори вазифасини бажарувчи Алексей Смирновнинг сўзларига кўра, расмийлар ўққа тутилган ҳудудлардан аҳолини олиб чиқишни ташкил қилиб, вақтинчалик яшаш жойларини тайёрлаган. Бир кун давомида бир неча минг киши отишма ва жанговар ҳаракатлар ҳудудини тарк этди.
Фуқаролик бўлимлари ишини бош вазирнинг биринчи ўринбосари Денис Мантуров мувофиқлаштиради. Владимир Путин билан учрашувда у вилоят аҳолисини кўчириш учун 1,8 миллиард рубл миқдоридаги биринчи транш юборилишини маълум қилди. Жами 2,5 минг оила учун 11 миллиард сўмлик аризалар йиғилган.
Украина Қуролли кучлари (УҚК) ҳужуми фонида Курск вилоятидаги вазият ҳақида асосий маълумотлар:
УҚК томонидан ўққа тутилиши натижасида 31 киши, жумладан, 6 нафар бола тан жароҳати олди, деб хабар берди Россия ССВ;
Россия халқаро ҳамжамиятни Киев режимининг Курск вилоятига ваҳшиёна ҳужумини қоралашга чақиради, деб хабар берди Россия ТИВ;
Украина ҳарбийларининг Курск вилоятига уюштирган ҳужуми вазиятнинг кескинлашуви хавфини оширмоқда, деди БМТ бош котиби идораси;
Курск вилоятида фавқулодда ҳолат жорий этилди, минтақанинг чегара ҳудудларида қийин оператив вазият сақланиб қолмоқда.
Россия президенти Владимир Путин Курск вилоятидаги вазиятга муносабат билдирар экан, аввалроқ Киев режими навбатдаги кенг кўламли провокацияга қўл ургани ва тинч аҳоли ва уларнинг манзилларини ҳам ўққа тутаётганини маълум қилган эди.
Россия Федерацияси Хавфсизлик Кенгаши раиси ўринбосари Дмитрий Медведев ўзининг Telegram-каналида маълум қилишича, Курск вилоятидаги воқеалардан кейин Россия ўзи учун мақбул ва фойдали деб ҳисоблагандагина тўхтайди. Медведевнинг ёзишича, Киев Курск вилоятига ҳужум қилганидан кейин Россия ҳали ҳам мавжуд Украина ерларига бориши мумкин ва керак. "Энди буни хижолатсиз ва дипломатик тўсиқларсиз очиқ муҳокама қилиш мумкин ва керак.
Украина Қуролли кучларининг Курск вилоятига ҳужумига АҚШнинг муносабати ғазабланарли, деди Россиянинг Вашингтондаги элчиси Анатолий Антонов.
"Америка расмийларининг Киев безориларининг Россия Федерацияси ҳудудидаги провокацион хатти-ҳаракатларига жавобан оммавий баёнотлари ҳақиқатдан ҳам ғазаблантиради", — деди у журналистларга.
Антонов таъкидлаганидек, Вашингтон расмийлари томонидан "мижозларига танқидий сўзлар ёки фожиа қурбонлари учун афсусланиш" бўлмаган. Дипломат Қўшма Штатларни Киевга қурол етказиб беришни тўхтатишга ва украиналик неонацистларни "жазолашга" чақирди.