ТОШКЕНТ, 31 июл — Sputnik. Париж-2024 ёзги Олимпия ўйинларида иштирок этаётган ўзбекистонлик боксчилар Ҳасанбой Дўсматов, Тўрабек Ҳабибуллаев ва Ситора Турдибекова баҳсларни омадли бошлашди. Бу ҳақда Миллий олимпия қўмитаси хабар берди.
Бокс бўйича Ўзбекистон эркаклар терма жамоаси таркибидаги энг ёш спортчи Тўрабек Ҳабибуллаев Париж-2024 ёзги Олимпия ўйинларидаги дастлабки баҳсида Олимпиада совриндорини мағлуб этди.
“20 ёшли чинозлик боксчимиз дебют жангида Токио-2020 ёзги Олимпия ўйинлари совриндори, филиппинлик Эймуир Марсиални мусобақадан чиқариб юборишга эришди”, — дейилади хабарда.
Шунингдек, бокс бўйича Рио-2016 ёзги Олимпия ўйинлари чемпиони Ҳасанбой Дўсматов ҳам иккинчи чемпионлик сари юришини бошлади.
"Бокс оламида "Профессор" номи билан машҳур бўлган ҳамюртимиз илк босқичда пуэрто-риколик 18 ёшли Хуан Лопесга қарши жанг ўтказиб, яққол устунлик билан ғалабага эришди”, — дея қайд этилган хабарда.
Энди у 2 август куни чорак финал жангини ўтказади.
Қолаверса, бокс бўйича Ўзбекистон аёллар терма жамоаси аъзоси Ситора Турдибекова (-57 кг) ҳам илк жангни муваффақиятли ўтказди.
Конго Демократик Республикаси вакиласи Марселат Сакоби билан тўқнаш келган ҳамюртимиз ишончли тарзда ғалабани ўз фойдасига ҳал қила олди ва иккинчи давра иштирокчисига айланди. Энди у 2 август куни икки карра жаҳон чемпиони, Ю-Тинг Линга қарши чорак финал йўлланмаси учун жанг қилади.