Сохта тренерлар учун жавобгарлик кучайтирилади

TOШКЕНТ, 23 июл — Sputnik. Сохта маърифий фаолият билан шуғуллаётган шахслар учун жавобгарлик кучайтирилади.

Депутатлар “Ўзбекистон Республикасининг айрим қонун ҳужжатларига маърифий фаолиятни амалга ошириш тартибини белгилашга қаратилган қўшимча ва ўзгартиришлар киритиш тўғрисида”ги қонун лойиҳасини муҳокама қилишди.

Қайд этилишича, кейинги пайтларда аҳолининг турли қатламлари, айниқса ёшлар ўртасида носоғлом маърифий ишларни амалга ошириш кўпайган.

Тадбирларнинг ташкилотчилари томонидан гўёки маърифий деб баҳоланадиган кўп сонли йиғинлар, учрашувлар, ўқув ва суҳбатлар махсус билим ва тажрибага эга бўлмаган ҳамда асосий мақсади ёлғон йўли билан пул ишлаш бўлган сохта тренерлар, лекторлар томонидан амалга оширилмоқда.

“Бундай тадбирларда диний қарашлар, кўпхотинлик, жинсий камситиш, ахлоқий бузуқлик, ҳуқуқбузарликлар тарғиб қилиниб, тингловчилар онгини манипуляция қилиш ҳолатлари ортмоқда. Амалдаги қонунчиликда маъруза, тақдимот, семинар, маҳорат дарси, курс, лекция, марафон ва давра суҳбати каби шаклларда амалга ошириладиган фаолият ҳуқуқий жиҳатдан тартибга солинмаган. Бу ўз навбатида қатор муаммоларни келтириб чиқармоқда”, — дейилади қуйи палата хабарида.

Қонун лойиҳасига кўра, Маъмурий жавобгарлик тўғрисидаги Кодекс ва “Таълим тўғрисида”ги қонун янги моддалар билан тўлдирилмоқда.

"Кодекс янги 594-модда билан тўлдирилиб, маърифий фаолиятни бундай фаолият билан шуғулланиш ҳуқуқига эга бўлмаган шахс томонидан кўрсатиш ёхуд маърифий фаолиятни амалга ошириш бўйича қонунчиликда белгиланган чекловларга риоя этмаслик ҳолатлари учун жавобгарлик белгиланмоқда. Қонун эса, 141-модда билан тўлдирилиб, мазкур қўшимча ва ўзгартиришлар орқали ушбу соҳадаги фаолиятни амалга ошириш талаблари белгиланмоқда", — дейилади хабарда.

Жумладан:

маърифий фаолият инсонни шахсий, интеллектуал ва маънавий ривожлантириш, ижтимоий ва иқтисодий фаоллигини ошириш, интеллектуал ва ижодий салоҳиятини намоён этиш, индивидуал салоҳияти, имкониятлари, коммуникатив қобилиятларини яхшилаш учун зарур кўникма ва малакани шакллантиришга қаратилган ҳамда давлат таълим стандартлари билан қамраб олинмайдиган фаолият тури ҳисобланиши белгиланмоқда;

маърифий фаолиятни республика ижро этувчи ҳокимият органлари, маҳаллий давлат ҳокимияти органлари, фуқароларнинг ўзини ўзи бошқариш органлари, жисмоний ва юридик шахслар томонидан қонунчилик ҳужжатларида назарда тутилган талабларни ҳисобга олган ҳолда амалга оширилиши мумкин эканлиги кўзда тутилмоқда;

маърифий фаолиятни амалга ошириши тақиқланган шахслар доираси белгиланмоқда;

маърифий фаолиятни амалга ошириш тартиби, шакллари, уни амалга ошириш талаблари ва шартлари Ўзбекистон Республикаси Вазирлар Маҳкамаси томонидан белгиланиши назарда тутилмоқда.

Депутатларнинг фикрича, қонун лойиҳасини қабул қилиниши билан маърифий фаолиятни амалга ошириш борасидаги тартибсизликларга барҳам берилади. Ноқонуний маърифий фаолият билан шуғуллаётган шахслар учун жавобгарлик кучайтирилади.

Мажлисда қонун лойиҳаси депутатлар томонидан қабул қилинди.

Ноқонуний тренерларга нисбатан жавобгарлик белгиланмоқда