ТОШКЕНТ, 21 июл — Sputnik. Евроосиё иқтисодий комиссияси (ЕИК) ҳайъати темир йўл транспорти соҳасида техник регламентларни жорий этиш бўйича стандартлар рўйхатларига ўзгартиришлар киритди. Рўйхатлар тўққизта стандарт билан тўлдирилади. Бу ҳақда ЕИК матбуот хизмати хабар берди.
Ўзгартиришлар ушбу стандартларнинг саноат учун алоҳида аҳамияти ва темир йўл машинасозлик маҳсулотларининг мувофиқлигини баҳолаш тартиб-қоидаларининг долзарблиги сабабли 30 календар кундан кейин кучга киради.
Бундан ташқари, стандартларнинг янги таҳрирлари бўйича мувофиқликни баҳолаш органларини аккредитациядан ўтказишни таъминлаш мақсадида 180 календар кундан кейин кучга кирувчи стандартлар рўйхатларининг янги таҳрирлари тасдиқланди.
Тегишли рўйхатларга киритилган стандартларни қабул қилиш, қўллаш, янгилаш ва бекор қилиш мониторинги натижалари бўйича стандартлар рўйхатларининг янги таҳрирлари тайёрланди.
“Ўзгартиришларнинг мақсади стандартларнинг жорий версияларини қўллаш учун шарт-шароитлар яратиш ва улар ишлаб чиқилиши ва жорий этилиши билан миллий стандартлардан давлатлараро стандартларга тизимли равишда ўтишдир”, - деди ЕИКнинг техник тартибга солиш бўйича вазири Валентин Татарицкий.
Стандартлар рўйхатига ўзгартиришлар Россия Транспорт вазирлиги томонидан ЕОИИ давлатларининг давлат органлари билан биргаликда экспертлар ва бизнес ҳамжамиятлари вакиллари иштирокида ишлаб чиқилган.