ТОШКЕНТ, 18 июн – Sputnik. “Ниппон Исшинно Кай” (Япония янгиланиш партияси) мухолифат партияси Япония Парламенти юқори палатасига мамлакат бош вазири Фумио Кисидага ишончсизлик вотуми билдирилган резолюция киритди, деб хабар бермоқда "Кёдо" агентлиги.
Тақдим этилган ҳужжатда ҳукмрон Либерал-демократик партия мухолифат билан келишувларга зид равишда “жамоатчилик билан алоқалар тадқиқоти”га сарфланадиган харажатлар бўйича шартларини бузгани қайд этилган. Японияда ушбу харажатлар учун депутатлар ойига 1 миллион иенагача (6,33 минг доллар) маош олади.
Ишончсизлик вотумида келтирилган яна бир сабаб - Фумио Кисида ҳукуматига нисбатан жамиятда ишонч даражасининг кескин тушиб кетиши дейилади.
Бир кун аввал NHК телеканали Япониянинг яна бир мухолиф Конституциявий-демократик партияси ҳам ҳукуматга ишончсизлик вотуми лойиҳасини парламентга киритиши ва парламентни тарқатиб юборишни талаб қилиши мумкинлиги ҳақида хабар берган эди.
"Асахи" газетаси эълон қилган сўров маълумотларига кўра, Япония бош вазири Фумио Кисида бошчилигидаги ҳукмрон ЛДП рейтинги 2001 йилдан бери биринчи марта 19 фоизга тушиб кетган. Ҳукумат рейтинги ҳам жуда паст – 22 %. Сўровда иштирок этганларнинг 64% ҳукуматга ишонмайди.