ТОШКЕНТ, 16 июнь — Sputnik. Ўзбекистон ва Бутунжаҳон туризм ташкилоти ўртасида маҳаллий туроператорларни қўллаб-қувватлаш борасидаги амалий ҳамкорлик кенгайтирилади. Бу ҳақда Шавкат Мирзиёев ва “БМТ Туризм” бош котиби Зураб Пололикашвили иштирокидаги учрашувда маълум қилинди.
Ўзбекистон президенти Самарқандда “БМТ Туризм” (Бутунжаҳон туризм ташкилоти) бош котиби Зураб Пололикашвили билан учрашди.
Президент Узбекистана провел встречу с генеральным секретарем "ООН Туризм"
© Пресс-служба президента Узбекистана
Унда Ўзбекистон билан БМТнинг мазкур ихтисослашган институти ўртасидаги кўп қиррали ҳамкорликни янада кенгайтириш масалалари муҳокама қилинди.
“Сайёҳлар учун қулай шарт-шароитлар ва объектларни барпо этиш, зиёрат ва маданий-маърифий туризмни, жумладан ички туризмни ривожлантиришга қаратилган дастур ва лойиҳаларни амалга ошириш бўйича қўшма саъй-ҳаракатларни давом эттириш муҳимлиги таъкидланди”, — дейилади хабарда.
Самарқандда фаолият юритаётган Халқаро туризм академияси имкониятларидан самарали фойдаланган ҳолда меҳмондўстлик ва сервис соҳасида малакали кадрлар тайёрлаш масалаларига алоҳида эътибор қаратилди.
“Ўзбекистонга туризм йўналишини оммалаштириш мақсадида маҳаллий туроператорларнинг йирик халқаро туризм ярмаркалари ва кўргазмаларида иштирок этишини қўллаб-қувватлаш борасидаги амалий ҳамкорлик кенгайтирилади”, — дея қайд этилган хабарда.