ТОШКЕНТ, 27 май — Sputnik. Мустақил Давлатлар Ҳамдўстлиги (МДҲ)га аъзо давлатлар ҳукумат раҳбарларининг қарорлари мамлакатларимиз ўртасидаги самарали ҳамкорликка хизмат қилади. Бу ҳақда Россия ҳукумати раҳбари Михаил Мишустин маълум қилди, деб хабар берди Россия ҳукумати матбуот хизмати.
Россия Вазирлар Маҳкамаси раҳбари МДҲ Ҳукумат раҳбарлари кенгашининг мажлиси бўлиб ўтган Туркманистонга амалий ташрифи якунларини сарҳисоб қилди.
У бош вазир ўринбосарларига ўзлари назорат қилган соҳалар бўйича келишувлар ижросини назорат қилишни топширди.
“Россия раислиги йилида биз Ҳамдўстлик нуфузини ошириш ва бошқа интеграция бирлашмалари билан алоқаларни кенгайтириш учун зарур бўлган барча ишларни қилишда давом этамиз. Ишончим комилки, МДҲ ҳукумат раҳбарларининг қарорлари мамлакатларимиз ўртасидаги самарали ҳамкорликка ҳисса қўшади ва, албатта, фуқароларимиз ҳаёт сифатини оширишга хизмат қилади”, — деди Мишустин.
Эслатиб ўтамиз, 24 май куни Ашхободда Мустақил Давлатлар Ҳамдўстлиги Ҳукумат раҳбарлари кенгашининг йиғилиши бўлиб ўтди. Бош вазирлар савдо-иқтисодий ҳамкорликни, жумладан, энергетика, саноат ва бошқа соҳалардаги ҳамкорликни кенгайтиришни муҳокама қилишди.
Учрашув якунлари бўйича энергетика, транспорт, кимё саноати, хавфли чиқиндилар билан ишлаш, тўпланган зарарларни бартараф этиш бўйича ҳамкорликни мустаҳкамлаш бўйича муҳим келишувларга эришилди. Шунингдек, МДҲ давлатлари биргаликда интеллектуал мулкни ҳимоя қилиш ва миллий телетиббиёт тизимларини ривожлантириш чораларини кўради.