ТОШКЕНТ, 26 май — Sputnik. Чуваш Республикаси Вазирлар Маҳкамаси ва Қашқадарё вилояти ҳокимлиги ўртасида иқтисодиёт, савдо ва туризм соҳасида шартнома имзоланади. Бу ҳақда Sputnik Ўзбекистон мухбирига Чувашия раҳбари Олег Николаевнинг матбуот котиби Борис Краснов маълум қилди.
Николаев ҳукумат делегацияси таркибида Владимир Путиннинг Ўзбекистонга давлат ташрифи дастурида иштирок этади.
Битимлар соғлиқни сақлаш, маданият, ёшлар ва спорт, фан ва таълим соҳаларига ҳам тааллуқлидир.
Эслатиб ўтамиз, 2023 йилда “Иннопром. Марказий Осиё” халқаро кўргазмасида Олег Николаев иштирокида қардош шаҳар алоқалари Новочебоксарск ва Қарши шаҳарлари ўртасида ўрнатилди.
Чуваш Республикасининг Ўзбекистон билан ташқи савдо айланмаси 2023 йилда ўтган йилга нисбатан 2,1 баробар ошиб, 27,8 миллион долларни ташкил этди. Ўзбекистон Чуваш Республикасининг 84 та ҳамкор давлатлари орасида 5-ўринни эгаллади. Ўзбекистонга экспортнинг умумий экспортдаги улуши қарийб 6 фоизни ташкил этади.