ТОШКЕНТ, 13 апр — Sputnik. Ғарб етакчилари Украинада тинчлик ўрнатилишини истамайдилар, чунки улар аллақачон Киев режимини қурол ва воситалар билан қўллаб-қувватлашга катта маблағ сарфлаганлар ва энди йўқотишлар учун қандайдир товон пулига умид қилмоқдалар, деди Пентагоннинг собиқ таҳлилчиси ва АҚШ ҳарбий-ҳаво кучларининг истеъфодаги лейтенанти Карен Квятковски БМТ Хавфсизлик кенгаши йиғилишида.
“Ғарб инвестициялари АҚШ ва НАТО заҳираларини камайтирди, шунингдек, Киевнинг Россия билан тўғридан-тўғри музокаралар олиб бориш имкониятини ҳам камайтирди. Ғарб етакчилари қанча пул сарфлаганини кўриб турибди ва қандайдир товон пули талаб қилмоқда. Улар ўз ҳиссаларини йўқотмоқчи эмас, шундай дейиш мумкин”, - деди Квятковски.
Россияга кўра, Украинага қурол етказиб бериш келишувга халақит бермоқда, НАТО давлатларини можарога бевосита жалб қилмоқда. Россия ташқи ишлар вазири Сергей Лавровнинг таъкидлашича, АҚШ ва НАТО можарода нафақат қурол-яроғ етказиб бериш, балки Буюк Британия, Германия, Италия ва бошқа мамлакатларда кадрлар тайёрлаш орқали ҳам бевосита иштирок этмоқда. Кремлнинг таъкидлашича, Украинани Ғарб қуроллари билан тўлдириш музокараларга ҳисса қўшмайди ва салбий таъсир кўрсатади.