ТОШКЕНТ, 17 мар — Sputnik. Тошкентда соат 18.00 га қадар Россия Федерацияси президенти сайловида деярли 3,5 минг россиялик овоз берди. Бу ҳақда участка сайлов комиссияси котиби Ирина Белкина Sputnik Ўзбекистон мухбирига маълум қилди.
Самарқандда ташкил этилган сайлов участкасида овоз берганлар сони 511 нафарни қайд этди.
Тошкент вилоятининг Олмалиқ, Ангрен ва Чирчиқ шаҳарларида яшовчи фуқаролар учун Тошкент шаҳридаги сайлов участкасига олиб бориш учун автобуслар ташкил этилди.
Ўзбекистонда овоз бериш учун 17 март куни Тошкент ва Самарқандда сайлов участкалари очилди. Сайлов участкалари бугун маҳаллий вақт билан соат 20:00 да ёпилади.
Маълумот учун, 2024 йилги Россия президенти сайловида овоз бериш 3 кун давом этади: 15, 16 ва 17 март кунлари. Давлат раҳбари лавозимига тўрт нафар номзод рўйхатга олинган: Леонид Слуцкий (ЛДПР), Николай Харитонов (КПРФ), Владислав Даванков (Новие люди) ва Владимир Путин (мустақил номзод).