ТОШКЕНТ, 11 мар — Sputnik. Туркиялик тадбиркор Самарқанд вилоятида сайёҳлик мажмуасини барпо этишни режалаштирмоқда, дея хабар берди "Дунё" АА.
Ўзбекистон Бош консулхонаси ходимлари туркиялик тадбиркор Рашид Хон билан музокара ўтказишди. Унда мамлакатга хорижий сармояларни жалб қилиш, қўшма лойиҳаларни амалга ошириш масалалари муҳокама қилинди.
“Томонлар Самарқанд вилоятида сайёҳлик мажмуасини барпо этиш лойиҳасини амалга ошириш истиқболларини ўрганиш тўғрисида келишиб олишди”, — дейилади хабарда.
Турк тадбиркорига Ўзбекистонда хорижий инвестор учун яратилган қулай ишбилармонлик муҳити, ишлаб чиқариш, савдо ва хизмат кўрсатиш, шунингдек, логистика имкониятлари тўғрисида батафсил маълумот берилди.
Мамлакатда саноат, транспорт, энергетика, туризм ва "яшил" иқтисодиётни ривожлантириш соҳаларида амалга оширилаётган йирик инвестициявий лойиҳалар ҳам айтиб ўтилди.
Эслатиб ўтамиз, аввалроқ мисрлик сармоядор Самарқандда сайёҳлик мажмуасини барпо этиш лойиҳасида иштирок этишга қизиқиш билдираётгани маълум қилинган эди. Сайёҳлик мажмуасини уч босқичда амалга ошириш режалаштирилган.