ТОШКЕНТ, 13 фев — Sputnik. Ўзбекистон ва Қозоғистон Устюрт платосининг ҳайвонот дунёсини асраб-авайлашда ҳамкорлик қилади. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар берди.
Самарқандда бўлиб ўтган CMS COP14 ялпи мажлиси доирасида экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов ва Қозоғистон экология ва табиат ресурслари вазири ўринбосари Нуркен Шарбиев ўртасида меморандум имзоланди.
“Меморандум доирасида Устюрт платосида ёввойи ҳайвонларнинг трансчегаравий популяциялари ва уларнинг кўчиб юрувчи турларини сақлашни таъминлаш бўйича ишчи гуруҳ тузилади ва чора-тадбирларнинг “Йўл харитаси” ишлаб чиқилади”, — дейилади хабарда.
Ҳужжатда қуйидагилар назарда тутилган:
кўчиб юрувчи турларнинг мувофиқлаштирилган мониторинги, тадқиқи ва инвентаризацияси;
ёввойи ҳайвонларнинг кўчиб юрувчи турларини муҳофаза қилиш ва биохилма-хилликни сақлаш;
трансчегаравий муҳофаза қилинадиган ҳудудлар ва миграция коридорларини яратиш;
ҳайвонот дунёси ресурсларидан барқарор фойдаланиш ва экотуризмни ривожлантириш имкониятларини ўрганиш;
мутахассислар тайёрлаш ва малакасини ошириш;
кўчиб юрувчи турларни сақлаш соҳасида замонавий ва инновацион технологияларни танлаш ва қўллаш бўйича маслаҳатлашувлар;
кўчиб юрувчи ҳайвонларни ноқонуний ёки асоссиз тутишга, шу жумладан, браконерлик ва ёввойи ҳайвонлар ҳамда уларнинг ҳосилалари контрабандасига қарши курашиш бўйича чора-тадбирларни мувофиқлаштириш ва кучайтириш;
қўшма илмий-амалий семинарлар ва конференциялар ўтказиш;
қўшма илмий ва илмий-оммабоп нашрларни тайёрлаш ва чиқариш;
яшаш муҳитининг парчаланиши ва деградациясининг олдини олиш чоралари;
“Йўл харитаси”нинг тегишли чора-тадбирларини амалга ошириш учун инвестициялар ва маблағларни жалб қилиш.
Келишув 2023 йилда Бутунжаҳон табиий мероси объектлари рўйхатига киритилган “Турон мўътадил чўллари” трансмиллий Бутунжаҳон табиий мероси объектини сақлаш бўйича Марказий Осиё давлатларининг мажбуриятларини бажариш мақсадида имзоланди.
Маълумот учун, Устюрт платоси Ўрта Осиёнинг ғарбий қисмида уч давлат – Ўзбекистон, Қозоғистон ва Туркманистон ҳудудида жойлашган. Ҳудуд нотекис рельефли, оғир об-ҳаво шароитлари ва турли хил экотизимларга эга.
Англашув меморандуми платода экологик муҳим ҳайвонлар миграциясини ҳимоя қилади. Имзоланган меморандумнинг бир қисми сифатида ёввойи сутэмизувчилар омон қолиш, кўпайиш ва миграция йўли билан тарқалиш жараёнида чегараларни эркин кесиб ўтишлари керак. Ўзбекистон ва Қозоғистон ўртасидаги ҳамкорлик тўғрисидаги меморандум ҳайвонларни муҳофаза қилиш доирасидан ташқарига чиқади ва ҳукуматлараро экологик ечимларни намойиш этади.