ТОШКЕНТ, 12 фев — Sputnik. Эронда ва бошқа истиқболли ҳамкор давлатлар ҳудудларида Евроосиё иқтисодий иттифоқи (ЕОИИ) савдо уйларини яратиш ташаббусини ишлаб чиқиш зарур. Бу ҳақда Евроосиё иқтисодий комиссияси (ЕИК) савдо вазири Андрей Слепнёв “Россия-2030 ва янги жаҳон иқтисодий тартиби: асосий омиллар ва бизнеснинг роли” халқаро форумида маълум қилди, дея хабар берди ЕИК матбуот хизмати.
Вазир ўтган йил охирида Эрон билан тўлиқ кўламли эркин савдо битимининг имзоланиши натижасида ушбу мамлакат бозорига кириш учун эксклюзив шартларга эришилганини эслатди.
“Вақтинчалик келишув муддати давомида биз савдо айланмасини икки баравар оширдик, доимий келишув кучга киргандан сўнг қисқа вақт ичида бу икки баробар кўпайтирилишини кутамиз. Тахминан уч йил ичида 12 миллиард долларга етиб, Эрон билан товар айирбошлаш ҳажмини ҳозирги 6 миллиард долларга нисбатан 18-20 миллиардга етказишга умид қиламиз”, — деди Слепнёв.
Шу билан бирга, унинг сўзларига кўра, товар айирбошлашнинг зудлик билан ўсиши учун фақат савдо келишувининг ўзи етарли эмас. Шунга асосланиб, у Россия саноатчилар ва тадбиркорлар иттифоқи (РСТИ) аллақачон бир неча бор бошлаган савдо уйлари ташаббусига эътибор қаратди.
“Биз ушбу ташаббусни қандай қилиб тўғри ташкил этиш ҳақида биргаликда ўйлашимиз керак. Биз ностандарт ёндашувлар зарур бўлган мураккаб бозорларга чиқмоқдамиз”, — дея таъкидлади ЕИК савдо вазири.
Шу муносабат билан Андрей Слепнёв ҳозирда Индонезия ва БАА билан эркин савдо бўйича музокаралар олиб борилаётгани ва ЕИК Миср билан якуний келишувларга эришишга умид қилаётганини маълум қилди. Бундан ташқари, Комиссия ушбу мамлакатнинг Шимолий-Жануб иқтисодий коридори учун аҳамиятини инобатга олган ҳолда Ҳиндистон йўлини фаоллаштиришга умид қилмоқда.