ТОШКЕНТ, 18 дек — Sputnik. Ўзбекистонлик Умида Омонова шахматнинг блиц йўналишида Осиё чемпионига айланди. Бу ҳақда Ёшлар сиёсати ва спорт вазирлиги хабар берди.
Айни кунларда БААнинг Ал-Айн шаҳрида шахмат бўйича ёшлар ва ўсмирлар ўртасида Осиё чемпионати ўтказилмоқда.
Мусобақада 41 та давлатдан 650 нафар шахматчи иштирок этмоқда.
“Ўзбекистон шарафини ҳимоя қилаётган Умида Омонова блиц йўналишида 1-ўринни қўлга киритди”, — дейилади хабарда.
Шунингдек, Даврон Шарипов 2-ўринни эгаллаган бўлса, Маликахон Жумаева ва Ҳуснорахон Ҳуснитдиновалар 3-ўрин соҳибига айланди.
Эслатиб ўтамиз, аввалроқ ўзбекистонлик Афруза Ҳамдамова Италияда бўлиб ўтаётган шахмат бўйича ёшлар ўртасидаги жаҳон чемпионатининг 14 ёшгача бўлган тоифасида муддатидан аввал жаҳон чемпиони бўлган эди.