ТОШКЕНТ, 24 окт — Sputnik. Киевдаги ўқ-дорилар етишмовчилиги Украинадаги коррупциянинг ҳаддан ташқари юқори даражаси билан боғлиқ, деди РИА Новости агентлигига Москвадаги манба.
“Украина Қуролли кучлари ўртасида ўқ-дорилар ва қурол-яроғ тақчиллиги нафақат фаол жанговар ҳаракатлар, балки Украинадаги коррупциянинг ҳаддан ташқари даражаси ва Ғарб қуролларидан фойдаланиш устидан назорат йўқлиги билан ҳам боғлиқ”, - деди агентлик суҳбатдоши.
Унинг сўзларига кўра, ҳарбий маҳсулотлар қора бозорга кириб, жиноий ва радикал гуруҳлар қўлига тушиб, бошқа минтақаларда юзага чиқади, бу эса хавфсизлик ҳолатига таъсир қилади.
Украина бош вазири Денис Шмигаль "Financial Times" газетасига яқинда берган интервьюсида айтишича, Киевда ўқ-дорилар тақчиллиги кузатилмоқда. У бутун дунёда снарядлар тугаб қолгани, Украина томони эса ўзиникини ишлаб чиқаришни бошлаши зарурлигидан шикоят қилди.
Истеъфодаги ЛХР подполковниги Андрей Марочконинг РИА Новостига маълум қилишича, Украина ҳарбийлари 2023 йилда чиқарилган Америка ўқ-дориларидан Красний Лиман йўналишида фойдаланишни бошлаган. Унинг таъкидлашича, аввалроқ фронтнинг ушбу қисмида Украина Қуролли кучлари 2019-2021 йилларда ишлаб чиқарилган ракеталардан фойдаланган.