ТОШКЕНТ, 18 окт — Sputnik. Ўзбекистон Ўмон билан Салала порти орқали Африка қитъасига чиқиш бўйича ишларни бошлашга келишиб олди. Бу ҳақда Савдо-саноат палатаси хабар берди.
Савдо-саноат палатаси раиси Даврон Ваҳабов ва Ўмон Султонлигининг Муваққат ишлар вакили Носир Ал-Мавалий ўртасида учрашув бўлиб ўтди. Унда мамлакатлар ўртасидаги савдо-иқтисодий ва сармоявий ҳамкорликни кенгайтириш масалалари муҳокама қилинди.
“Ўмоннинг Салала Порти орқали Африка қитъасига чиқиш, реекспортни йўлга қўйиш, шунингдек балиқчилик ва асалчилик тармоғида ҳамкорликни янада ривожлантириш ва тажриба алмашиш бўйича ишларни бошлашга келишиб олинди”, — дейилади хабарда.
Учрашув якунида икки мамлакат ишбилармон доираларини яқинроқ алоқалар ўрнатиш ва қўшма лойиҳаларни амалга оширишга жалб этиш бўйича ҳамкорликда ишлашга ўзаро тайёрлик билдирилди.