ТОШКЕНТ, 7 окт — Sputnik. Шавкат Мирзиёев Қозонга ташрифидан сўнг Москвага етиб келди. Россия пойтахтига етиб келган президент Александр боғидаги Номаълум аскар қабрига гул қўйди.
Шундан сўнг Мирзиёев Россия ҳукумати ҳузуридаги Мувофиқлаштириш марказида Михаил Мишустин билан учрашиб, Ўзбекистонда соғлиқни сақлаш, таълим соҳаларини рақамлаштириш ва электрон тижоратни жорий этиш соҳасидаги ҳамкорликни муҳокама қилди.
Навбатда Мирзиёев ва Путиннинг тор доирадаги учрашуви бўлиб ўтди. Икки давлат раҳбарлари ҳудудлар ўртасидаги ўзаро ҳамкорликни янада ривожлантириш муҳимлигини таъкидлаб, саноат кооперацияси бўйича алоҳида “йўл харитаси”ни тайёрлашга келишиб олдилар, Россияда меҳнат қилаётган Ўзбекистон фуқаролари учун ижтимоий кафолатларни таъминлаш масалаларини муҳокама қилдилар.
Кейин президентлар кенгайтирилган таркибда музокараларни давом эттирдилар, унинг натижасида 20 дан ортиқ ҳужжат имзоланди. Битимлар “Агроэкспресс” лойиҳаси, транспорт, фан, таълим ва маданият соҳалари, шунингдек, идоралараро ҳамкорликка тегишли.