ТОШКЕНТ, 25 сен — Sputnik. "САМО" МЧЖ корхонасининг фармацевтик фаолияти бўйича текширув ишлари олиб борилмоқда, деб хабар қилмоқда Ўзбекистон Соғлиқни сақлаш вазирлиги ҳузуридаги "Фармацевтика маҳсулотлари хавфсизлик маркази".
ССВ ҳузуридаги “Фармацевтика маҳсулотлари хавфсизлиги маркази” давлат муассасасининг Фармацевтика фаолиятини лицензиялаш бошқармаси томонидан "Антиструмин" дори воситасини ишлаб чиқарган "САМО" МЧЖ корхонасида фармацевтик фаолият бўйича текширув ишлари олиб борилмоқда, - дейилади хабарда.
Текширув давомида дори воситаларини ишлаб чиқариш, тайёрлаш, сақлаш ва улгуржи реализация қилиш қонунга мувофиқ амалга оширилгани, шунингдек, "Антиструмин" дори воситасининг хавфсизлик кўрсатгичлари ўрганиб чиқилади.
Эслатиб ўтамиз, ўтган ҳафтада Ўзбекистонда таркибида йод моддаси бўлган "Антиструмин" дори воситасини истеъмол қилиш оқибатида Наманган вилоятидан бир неча ўнлаб болалар ўзини ёмон ҳис қилишни бошлаган эди. Шундан сўнг ССВ мактаб ва боғчаларда бепул тарқатиш белгиланган ушбу дори воситасидан фойдаланишни дарҳол тўхтатган эди.