ТОШКЕНТ, 28 авг — Sputnik. Остонада Ўзбекистон, Қозоғистон ва Қирғизистон энергетика вазирларининг минтақада сув-энергетика соҳасида ҳамкорликни ривожлантиришга қаратилган навбатдаги учрашуви бўлиб ўтди. Қозоғистон Энергетика вазирлиги матбуот хизмати хабар берди.
Тадбир давомида келгуси куз-қиш мавсумида электр энергияси етказиб бериш масалалари муҳокама қилинган, қатор ўзаро келишувларга эришилган, етказиб бериш ҳажмлари ва муддатлари белгиланган.
Шунингдек, раҳбарлар электр энергиясининг соатлик ҳисобини юритиш механизмини жорий этиш имкониятларини ишлаб чиқиш, хўжалик юритувчи субъектлар ўртасида режадан ташқари оқимларни ҳисоб-китоб қилиш бўйича шартномалар тузиш, режадан ташқари оқимларни ҳисоб-китоб қилиш бўйича шартномаларнинг амалдаги шартларини қайта кўриб чиқишга келишиб олган.
Ўзбекистон Энергетика вазирлигининг хабар қилишича, учрашув доирасида қўшни давлатлар билан трансчегаравий гидроэнергетика лойиҳаларини амалга ошириш, хусусан, "Қамбарота-1" ГЭС лойиҳаси ҳам муҳокама қилинган.