ТОШКЕНТ, 26 авг — Sputnik. Пойтахт истеъмолчиларининг сувдан қарздорлиги юқори, дея хабар берди Ўзсувтаъминот.
Қайд этилишича, айни кунда пойтахт истеъмолчиларининг “Тошкент шаҳар сув таъминоти” олдидаги дебитор қарздорлиги юқорилигича сақланиб турибди.
Қарздорликларни ўз вақтида ундириш, сувдан самарали ва мақсадли фойдаланишни таъминлаш мақсадида рейд тадбирлари ўтказилди.
“Сиздан ичган сувингизга ҳақ сўралмоқда...Сўнгги вақтларда сув масаласи кундалик мавзуга айланиб улгурди. Кимдир сув нархи ошишини муҳокама этса, яна кимдир ичимлик суви йилдан йилга камайиб бораётганидан ҳавотирини яширмайди. Бироқ, ҳеч ким истеъмолчи сифатида ўз мажбуриятлари хусусида сўз очишни истамайди”, дейилади хабарда.
Таъкидланишича, қарздорлик аксарият лойиҳа ва режалаштирилган ишларнинг ўз вақтида бажарилиши, ишчи-ходимларнинг моддий таъминотини яхшилаб боришга имкон бермаяпти.
“Жорий йилнинг май ойидан шу кунга қадар 265 та ҳолатда сувдан ноқонуний ёки белгиланган соатлардан ташқари вақтларда фойдаланиш ҳолатлари аниқланди”, дейилади хабарда.
Қўшимча қилинишича, 162 та қарздор истеъмолчидан қарийб 169 миллион сўм ундирилди. 126 миллион сўмдан ортиқ қарздорлиги бўлган 84 та истеъмолчининг сув қувурлари асосий тармоқлардан узилди. Шунингдек, 4 мингга яқин истеъмолчидан 11 миллиард сўмдан ортиқ қарздорликни ундириш бўйича судга ариза киритилди.