ТОШКЕНТ, 29 июл — Sputnik. Ногиронлиги бор шахслар учун "Тўсиқсиз туризм" дастури амалга оширилади. Бу ҳақда Маданият ва туризм вазирлиги хабар берди.
Келаси йилнинг 1 январидан бошлаб ногиронлиги бўлган шахсларнинг саёҳат қилишлари учун қулай муҳит яратишга қаратилган “Тўсиқсиз туризм” дастури амалга оширилади.
Бу ҳақда президентининг "Туризм йўналишидаги ислоҳотларни янада жадаллаштириш ва соҳада давлат бошқаруви тизимини самарали ташкил қилиш чора-тадбирлари тўғрисида" қарорида кўзда тутилган.
"Дастур доирасида ҳар йили “Саёҳат барча учун!” лойиҳаси доирасида Қорақалпоғистон республикаси, вилоятлар ва Тошкент шаҳрида 1000 нафардан ногиронлиги бўлган шахсларнинг республиканинг туризм салоҳияти юқори бўлган шаҳарларига бепул саёҳатлари ташкил қилинади", дейилади хабарда.
Шунингдек, туризм, маданий мерос, концерт-томоша объектлари ҳамда аэропорт, авто ва темир йўл вокзалларида ногиронлиги бўлган шахсларнинг тўсиқсиз ҳаракатланиши учун зарур инфратузилма яратиш механизмлари жорий қилинади.