Шавкат Мирзиёев Миланда тўқимачилик кўргазмасига ташриф буюрди

Шавкат Мирзиёев Миланда тўқимачилик кўргазмасига ташриф буюрдиТОШКЕНТ, 9 июн — Sputnik. Ўзбекистон президенти Шавкат Мирзиёев Италияга расмий ташрифи доирасида шу кунларда Милан шаҳрида ўтаётган “ITMA 2023” тўқимачилик машинасозлиги халқаро кўргазмасига ташриф буюрди.

Президентга Ломбардия вилояти губернатори Аттилио Фонтана ва кўргазма ташкилотчиси – “Sematex” агентлиги раҳбари Эрнэсто Маурэр ҳамроҳлик қилди.

Шавкат Мирзиёев йигириш ва тўқиш ускуналарини ишлаб чиқаришда дунёда етакчи бўлган “ITEMA” (Италия), “Stäubli Group” (Швейцария), “Picanol”, “Vandewiele” (Бельгия) ва бошқа компанияларнинг стендларини кўздан кечирди ва компания раҳбарлари билан мулоқот қилди, янги технологик ечимларнинг тақдимотлари билан танишди.

Президент робототехника ва сунъий интеллектдан фойдаланган ҳолда янги, талаб юқори бўлган “супер-материаллар” яратиш мақсадида юртимизда матога ишлов бериш учун энг замонавий ускуналар ва инновацион ечимларни жорий қилиш истиқболли эканини қайд этди.

Ташриф якунида президент мутасадди раҳбарларга Ўзбекистонда ускуналарни маҳаллийлаштириш, ишлаб чиқариш қувватларини релокация қилиш ва ўқув дастурларини амалга ошириш имкониятларини ўрганиш топширилди.

“ITMA 2023” – ҳар тўрт йилда бир марта ўтказиладиган тўқимачилик ва тикувчилик технологияларига бағишланган дунёдаги энг йирик кўргазма. Охирги кўргазма 2019 йилда Барселона шаҳрида ўтди. Жорий йилда 20 гектар майдонни эгаллаган кўргазмада 47 мамлакатдан 1 700 иштирокчи ҳамда турли давлатлардан 100 минг нафарга яқин меҳмон иштирок этмоқда.