ТОШКЕНТ, 7 июн – Sputnik. Самарқандда тўрт йигит кўп қаватли уйнинг деразасидан тушиб кетган қизчанинг ҳаётини сақлаб қолди. Бу хақда вилоят Ички ишлар бошқармаси матбуот хизмати хабар берди.
Хабарда келтирилишича, Самарқанддаги мактаблардан бирининг 11-синфини битираётган Шоҳрух Бобораҳимов, Мурод Саидалимов, Озод Ўткиров ва Жасур Эшназаров сайр қилиб юришганда кўп қаватли уйнинг 4-қаватида боши панжара орасига тиқилиб, танаси ҳавода осилиб турган кичкина қизчани кўриб қолишган.
Ўқувчилардан бири дарҳол қизалоқнинг ота-онасига хабар бериш учун тепа қаватга югуради, қолган учовлон қизалоқ осилиб қолган балкон остида қўлларини чўзиб, тирик қутқарув панжарасини ясашади.
Болалардан бири зинапоядан чиқаётган пайтда қизалоқ пастга қулаб тушган. Йигитлар эса уни зудлик билан тутиб олишган.
Кейинроқ аниқланишича, онаси уй ишлари билан овора бўлиб юрган пайтда қизалоқ эшик қулфи бузилиб қолган балконга чиқиб қолган экан. У пешонасидан енгил жароҳат олган.