ТОШКЕНТ, 2 июн — Sputnik. Бирлашган Араб Амирликларининг (БАА) "Wizz Air" лоукостер авиакомпанияси Бухорога тўғридан-тўғри авиақатновларни йўлга қўймоқчи. Бу ҳақда Бухоро вилояти Маданият ва туризм бошқармаси хабар берди.
Бухоро вилояти Маданият ва туризм бошқармаси бошлиғи БААдаги "WizzAir" лоукостер авиакомпанияси мутасаддилари билан музокаралар ўтказди.
© Пресс-служба управления Культуры и туризма Бухарской области
Ҳозирда авиакомпания Тошкент ва Самарқандга Абу-Дабидан тўғридан-тўғри рейсларини йўлга қўйган. Музокаралар давомида келгусида ушбу рейсларни Бухородан ҳам амалга ошириш бўйича таклифлар кўриб чиқилди.
Ушбу таклиф БАА лоукостери раҳбарияти аъзоси Крислен Кери томонидан қўллаб-қувватланди.
Шунингдек, учрашув давомида Бухоро халқаро аэропорти ва Бухоро вилоятининг туристик салоҳияти тақдимоти ўтказилди.
“Келгусида мазкур авиакомпания билан ҳафтасига Абу Даби-Бухоро-Абу Даби рейсларини амалга ошириш бўйича Бухоро вилояти ҳокимлиги, Бухоро халқаро аэропорти билан барча чораларни кўришга қарор қилинди”, - дейилади хабарда.
Қайд этилишича, бу Бухорога БААдан келадиган сайёҳлар сонининг сезиларли даражада ошиш имконини яратади.