ТОШКЕНТ, 8 май — Sputnik. Тошкент, Жиззах, Самарқанд, Сурхондарё, Бухоро ва бошқа ҳудудларнинг миллий таомлари Гулистонда ўтказилаётган III халқаро бахшилар фестивалида очилган гастрономик кўчада жамланди, деб хабар бермоқда Sputnik мухбири.
Хоразмча сузма палов
“Қовурилмасдан парда пиширилади, 4 соат димланиб туради. Хонқа ҳудудининг лазер гуручидан тайёрланади. Мен 18 йилдан бери ош дамлайман, касбим орқали Россия, Қозоғистон, Германия давлатларига саёҳат қилиб, у ерда ҳам ош пиширганман”, - деди хоразмлик ошпаз Шуҳрат Матназаров.
Жиззахча тандир кабоб
“Махсус тандирда қўй гўштидан тайёрланади. 1,5 соатда ўтин оловда димлаб пиширилади. 15 йилдан буён шу касб билан шуғулланаман. Таомдан Америка давлатлари, Беларус, Россия, Осиё давлатларига юборамиз”, - деди жиззахлик ошпаз Собиржон Ғайбуллаев.
Тошкентча ош
“Ошпазлик менга ота мерос, 10 йилдан буйин тўй-ҳашамларда хизматдаман. Бугун гастрономик кўчада Хоразмнинг лазер гуручидан 35 кг ош дамладим. Рус, қирғиз, қозоқ, қорақалпоқ, корейс, хитой каби миллатлар ошни севиб тановвул қилишади”, - деди ошпаз Одил Ҳожимуродов.
Мадор сомса
“Мадор тоғда ўсади. Фестивалга Тошкент вилояти Паркент тумани тоғларидан мадор олиб келдик. Бу ерда тандирда сомсаларни ёпиб, меҳмонларга улашдим. Мадор сомса соғликка ўта фойдали, анемияни даволайди, иммунитетни кўтаради”, - деди паркентлик сомсапаз Шаҳноза Дадаматова.
Мадор сомса
© Sputnik
Фестивалдаги гастрономик кўчада бошқа вилоятларнинг миллий таомлари норин, шўрва, қозон кабоб, қази, айрон гўжа, тухум барак, нўхатшўрак тайёрланди.
Сабзавотлар, полиз экинлари ва бошқа маҳсулотлар кўргазмаси бўлиб ўтди.