ТОШКЕНТ, 26 апр — Sputnik. Тошкентда 27-29 апрель кунлари II Green Art халқаро ландшафт санъати экофестивали бўлиб ўтади. Унда Ўзбекистон, Россия ва Қозоғистоннинг ландшафт архитекторлари иштирок этади. Бу ҳақда Ўзбекистон ландшафт дизайни ассоциацияси раҳбари Татьяна Югай маълум қилди, дея хабар берди Sputnik мухбири.
Бу йилги экофестиваль Табиат ресурслари вазирлиги ташаббуси билан фестивални халқаро доирада, кенгроқ кўламда ўтказилади. Ландшафт дизайни, экология ва ҳайкалтарошлик бўйича янги ижодий ишлар, кўргазмали стендлар намойиш этилади.
Тадбирдан кўзланган мақсад Ўзбекистонда экология ва кўкаламзорлаштириш масалаларига жамоатчилик эътиборини қаратиш ва халқаро доирада тажриба алмашишдан иборат.
Экофестивалда манзарали ўсимликларнинг кўргазмаси ташкил этилади. Унда Ўзбекистондан “Ботаник”, “Zuhriddin flowers”, “Toshkent gullari”, Россиядан “Девяточка”, “Питомник Савватеевих", Италиядан “Pistoia Flor” каби брендлар иштирок этади.
Кичик боғдорчилик ва хиёбон ландшафти бўйича ҳам кўргазмалар ўтказилади. Ўзбекистон, Россия, Қозоғистондан арк, ўриндиқ ва бошқа дизайнлар бўйича ландшафт архитекторлар иштирок этади.
“Экофестивалда илмий конференция ҳамда ёшлар форуми ҳам ташкил этилади. Жаҳоннинг ривожланган мамлакатларидан олимлар ва мутахассислар иштирок этади. Ёшлар форуми доирасида ҳаваскор, ёш ва маҳоратли мутахассисларнинг кўргазма ишлари кўрилади, Ўзбекистоннинг қатор шаҳарлари бўйлаб саёҳатлар уюштирилади”, - деди Татьяна Югай.
Тадбир кунлари “Мегаполисдаги кичик боғ” лойиҳаси бўйича танлов ташкил этилади ва ғолиблар муносиб тақдирланади.
Экофестиваль "Hyatt" меҳмонхонаси олдидаги майдонда бўлиб ўтади.