ТОШКЕНТ, 17 апр — Sputnik. Ўзбекистон Мудофаа вазирлиги ҳузуридаги Жамоатчилик кенгашининг вазифалари белгиланди. Президент 11 апрель куни тегишли фармонни имзолади.
Унга кўра кенгашнинг асосий вазифалари:
мудофаа ва ҳарбий соҳада жамоатчилик ҳамда халқаро ҳамжамият томонидан билдирилган таклифларни таҳлил қилиш;
Мудофаа вазирлигини фуқаролар билан боғлаб турувчи “кўприк” вазифасини бажариш;
ҳарбий хизматчилар ижтимоий- ҳуқуқий жиҳатдан ҳимоя қилиш бўйича тегишли дастурларнинг бажарилишини комплекс таҳлил қилишда иштирок этиш;
ҳарбий хизматдан резерв (захира)га бўшатилган фуқароларнинг ижтимоий ва профессионал мослашуви ҳамда бандлиги билан боғлиқ, масалаларни ҳал этишда бевосита иштирок этиш;
Мудофаа вазирлигига норматив-ҳуқуқий ва бошқа ҳужжатлар лойиҳаларини ишлаб чиқишда кўмаклашиш;
ёшларни ватанпарварлик, истиқлол ғояларига садоқат руҳида тарбиялаш ишларини мувофиқлаштириб боришда иштирок этиш.
Жамоатчилик кенгаши ўз фаолиятини жамоатчилик асосида олиб борадиган маслаҳат-кенгаш органи ҳисобланади.
Жамоатчилик кенгашининг қарори кенгаш мажлисида иштирок этаётган аъзоларнинг кўпчилик овози билан қабул қилинади. Жамоатчилик кенгашининг ҳар бир аъзоси мажбурий равишда қабул қилинаётган қарор бўйича ўзининг алоҳида фикрини ёзма шаклда ифодалашга ҳақли. Жамоатчилик кенгашининг қарори тавсиявий хусусиятга эга.