ТОШКЕНТ, 5 апр — Sputnik. Сўнгги олти йилда Ўзбекистон аҳолиси 5,5 миллион нафарга ўсган, 2017 йилдан буён 326 мингта янги уй-жой фойдаланишга топширилган. Бу ҳақда президент Шавкат Мирзиёев раислигида ўтказилаётган 2023 йилги ипотека дастури муҳокамасига бағишланган йиғилишда таъкидланди.
Қайд этилишича, бу даврда уй-жой билан таъминланганлик даражаси аҳоли жон бошига 18 фоизга ошган.
Охирги уч йилда 210 минг оилага 33 триллион сўмлик ипотека кредитлари ажратилган, эҳтиёжманд 73 минг оилага бошланғич бадал ва фоиз тўловлари учун 1,3 триллион сўм субсидия берилган.
Соҳага бозор тамойиллари жорий қилиниб, юзлаб хусусий буюртмачи компаниялар шаклланган. Сейсмик хавфсиз ва энергия тежамкор йиғма темир-бетонли кўп қаватли уйларни қуриш бўйича 11 та йирик кластер пайдо бўлган.