ТОШКЕНТ, 24 мар — Sputnik. Қорақалпоғистоннинг Амударё туманида 23 март куни янги қурилаётган темир йўл кўпригининг бир қисми қулаб тушди. Туман ҳокимлиги ҳолат юзасидан муносабат билдирди.
Хабарда ёзилишича, президент Шавкат Мирзиёевнинг Хоразм вилоятига ташрифи давомида Қорақалпоғистон Республикаси ва Хоразм вилоятини боғловчи Амударё устига автомобиль ва темир йўл қўшма кўпригини қуриш ишлари бошланган.
Янги кўприк қурилиши лойиҳасига буюртмачи этиб “Ўзбекистон темир йўллари” компанияси, бош лойиҳачи этиб “Боштранслойиҳа” АЖ, бош пудратчи этиб “Ўзбекистон темир йўллари” АЖнинг таркибий бўлинмалари белгиланган.
Амударё тумани ҳудудидан Хоразм вилояти ҳудудига темирйўл транспорти тармоғини йўлга қўйиш мақсадида, Амударё тумани ҳудудининг шимолий қисмидан ўтувчи А-380 Ғузор—Бухоро—Нукус—Бейнеу автомобиль йўлининг 717—718-километр оралиғидан осма кўприк ўтказилган.
Бу кўприкка 14-сонли кўприк қурилиш отряди вақтинчалик таянч балкаларни ўрнатган. Мазкур балкалар кўприк қурилишида вақтинчалик вазифа бажарувчи, ёрдамчи восита ҳисобланади.
23 март куни эрталаб ушбу кўприкнинг вақтинчалик таянч иккита балкаси номаълум сабабларга кўра қулаб тушган.
Ҳодиса оқибатида ҳеч ким жабрланмаган. Ҳозир бу ҳолатга ойдинлик киритиш мақсадида Тошкент шаҳридан тегишли мутахассислар ва лаборатория ходимлари чақирилган.