ТОШКЕНТ, 15 мар — Sputnik. Россия қирувчи самолётлари ҳаво-десант қуролларидан фойдаланмаган ва Қора денгиз осмонида АҚШ учувчисиз қурилмаси билан алоқага чиқмаган. Бу ҳақда РИА Новости Россия Мудофаа вазирлиги баёнотига таянган ҳолда хабар берди.
Айтилишича, сешанба куни эрталаб Қрим яримороли ҳудудида Россия Федерацияси давлат чегараси йўналишида транспондерлари ўчирилган АҚШ учувчисиз учар аппарати парвози қайд этилган.
Дрон Қора денгиз устидаги ҳаво ҳудудидан фойдаланиш учун режим ҳудуди чегараларини бузган. Шу муносабат билан ҳаво ҳужумига қарши мудофаа кучларининг навбатчи қирувчилари дронни аниқлаш учун ҳавога кўтарилди, дея хабар беради Мудофаа вазирлиги.
“Москва вақти билан соат 09:30 атрофида кескин манёврлар натижасида MQ-9 учувчисиз учар аппарати баландликни йўқотиб, назоратсиз парвозга чиқди ва сув юзаси билан тўқнашиб кетди. Россия қирувчи самолётлари ҳаво-десант қуролларидан фойдаланмаган, учувчисиз учар аппарати билан алоқада бўлмаган ва ўз база аэродромига мувафақиятли қайтишган”, — дейилади вазирлик хабарида.
Сешанба куни Пентагон ва Америка армиясининг Европа қўмондонлиги Қора денгиз узра Россиянинг Су-27 қирувчиси ва Американинг MQ-9 Reaper дрони тўқнашуви ҳақида баёнот берди.
Америка томонига кўра, Су-27 MQ-9га урилган, натижада у бошқарувни йўқотган ва АҚШ қуролли кучлари дронни уриб туширишга мажбур бўлган.
АҚШнинг Европадаги қўмондонлиги ҳодиса ҳақида АҚШ президенти Жо Байденга ахборот берилганини маълум қилди.