Ташкент, 23 фев — Sputnik. Тошкентда профессионал актёрларнинг янги авлоди етишиб чиқмоқда. Бу ҳақда россиялик таниқли актриса Алёна Хмельницкая Бутунроссия давлат кинематография институти Тошкент филиалида ўтказган маҳорат дарси чоғида маълум қилди, дея хабар берди Sputnik мухбири.
Россиялик таниқли актриса Алёна Хмельницкая Бутунроссия давлат кинематография институти (БДКИ) Тошкент филиалида ўзбекистонлик талабалар учун маҳорат дарси ўтказди.
Алёна Хмельницкая
© БДКИ Тошкент филиали
Маҳорат дарси давомида қуйидагиларга эътибор қаратилди:
Актёрлик маҳорати;
Кинокадрда ҳиссиёт билан ишлаш, мимика, ижро услублари;
К.Станиславский мактаби, театр ва кино структуралари;
Телебошловчилик сирлари;
Имидж;
Телевидениеда янги кўрсатувлар ва шоу-дастурлар.
Алёна Хмельницкая
© БДКИ Тошкент филиали
“Тошкентда профессионал актёрларнинг янги авлоди етишиб чиқаётганидан хурсандман. Устоз Рустам Сагдуллаев билан учрашув ҳам мен учун кутилмаган ва ўзига хос тарзда бўлди. Актёрнинг шогирдлари ҳам менда катта таассурот қолдиришди”, деди актриса.
Филиал директори Элдар Юлдашевнинг сўзларига кўра, филиалда профессионал мутахассислар ва ижодкорларнинг маҳорат дарслари мунтазам равшида ўтказиб келинмоқда.
Талабалар учун россиялик продюсер ва актёр Василий Соловьёв иштирокидаги маҳорат дарси ҳам режалаштирилган.
“Талабалар мазкур жараёнларда ҳар томонлама билим ва кўникма тўплайдилар, шу билан бир қаторда ўз йўналиши бўйича маҳоратли ижодкор билан яқиндан суҳбатлаша олишади”, дейди Элдар Юлдашев.
Алёна Хмельницкая
© БДКИ Тошкент филиали
Маълумот учун, Алёна Хмельницкая – россиялик таниқли бошловчи, профессионал театр ва кино актрисаси. Ижодий фаолияти давомида 80 дан ортиқ ролларни ижро этган. “Россия-1”, “Первый канал” каби рус телеканалларида турли кўрсатувларда бошловчилик қилган.