ТОШКЕНТ, 22 фев — Sputnik. Россия ҳукумати Ўзбекистондан фуқароларни ишга жалб қилиш бўйича пилот лойиҳасини тўхтатди. Бу ҳақда Россия бош вазири Михаил Мишустин томонидан имзоланган тегишли қарорда назарда тутилган.
Ҳужжатга кўра, ҳукумат Ўзбекистон фуқароларини Россия қурилиш индустрияси, енгил саноат ва қишлоқ хўжалиги корхоналарида ишлашга жалб қилиш бўйича тажриба лойиҳасини амалга оширишни тўхтатди.
2021 йил октябрь ойида Ўзбекистондан меҳнат мигрантларини, хусусан, Россия қурилиш объектларига жалб этиш бўйича синов дастури ишга туширилган. Унга мувофиқ, Россияда ишлаш ҳуқуқини берувчи рухсатномалар олишнинг бир қатор тартиблари Ўзбекистонга ўтказилди.
Шу жумладан, мигрантларни тиббий кўрикдан ўтказиш, COVID-19 тестини ўтказиш ва “Спутник Лайт” билан эмлаш, шунингдек, Россияга киришни тақиқлашни текшириш масалалари назарда тутилган.
Қурилиш вазирлиги матбуот хизмати РИА Новостига маълум қилишича, энди пандемияга қарши чекловлар олиб ташланиши шароитида, жумладан, чегарадан ўтиш жойларида синов лойиҳасини давом эттириш мақсадга мувофиқ эмас.
Маълумотларга кўра, лойиҳа доирасида Россия қурилиш объектларига 4750 нафар Ўзбекистон фуқароси келган.