ТОШКЕНТ, 8 фев — Sputnik. Тошкентда Ўзбекистон – Словения бизнес форуми бўлиб ўтди.
Унда тегишли вазирлик, идоралар, тармоқ бирлашмалари раҳбарлари ва икки мамлакат ишбилармон доираларининг 100 дан ортиқ вакиллари иштирок этишди. Форумда Ўзбекистон делегациясига Ўзбекистон бош вазирининг ўринбосари Жамшид Ходжаев, Словения делегациясига эса Словения бош вазирининг ўринбосари — ташқи ишлар вазири Тани Файон бошчилик қилди.
“Ўзбекистон – Словения” бизнес-форуми
© Инвестициялар, саноат ва савдо вазирлиги
Тадбирда қайд этилишича, ўтган йил давомида икки мамлакат ўртасидаги ташқи савдо айланмасининг ҳажми қарийб 40 фоизга ошди. Бу кўп жиҳатдан Ўзбекистоннинг “GSP+” преференциялар тизимининг бенефициари мақомини олиши туфайли мумкин бўлди.
Тадбирда ташқи савдодаги кўрсаткичларни янада ошириш мақсадида Ўзбекистон ва Словения ўртасида Иқтисодий ҳамкорлик тўғрисида битим имзоланди. Мазкур ҳужжат икки мамлакат ишбилармон доиралари учун зарур қўшимча шарт-шароитларни яратиб беришга мўлжалланган.
Ўзбекистон ва Словения ишбилармон доиралари автомобилсозлик, бутловчи қисмлар, металл буюмлар, гидравлик турбиналар, насослар, фармацевтика маҳсулотларини биргаликда ишлаб чиқиш, шунингдек чорвачилик, боғдорчилик ва уруғчиликни ривожлантириш бўйича қўшма лойиҳаларни амалга оширишга келишиб олишди.