ТОШКЕНТ, 4 фев — Sputnik. Ўзбекистон бу йил 1000 нафар чет эллик профессор-ўқитувчини тиббий ўқув жараёнларига жалб этади. Бу ҳақда Соғлиқни сақлаш вазирлиги хабар берди.
Қайд этилишича, 2023 йил 1500 нафар врач хорижда ўз малакасини оширса, 1000 нафар чет эллик мутахассис ўзбек талабаларига сабоқ беради.
Жумладан:
гематология ва онкогематология бўйича мутахассислар, нефролог, эндокринолог ҳамда кардиологлар Россияда;
ҳамширалар Германияда;
онкологлар Кореяда;
хирурглар Ҳиндистонда;
кардиохирурглар, трансплантологлар Саудия Арабистони ва Туркияда;
раҳбар кадрлар эса Сингапур ва Туркия давлатларида малакасини ошириш бўйича ҳамкорлик йўлга қўйилган.
Шунингдек, бу йил 7,5 минг нафар битирувчи ҳисобига оилавий шифокор ваканциясини 90 фоизга, тор мутахассислар ваканциясини эса 70 фоизга қисқартириш кўзда тутилган.
Бундан ташқари, тиббиёт институтларда 2023/2024 ўқув йилидан бошлаб бакалавриат, магистратура ва клиник ординатура ўқув режаларига “нано технология”, “тиббиёт генетикаси”, “IT-технологияси” каби фанлар киритилади ва хорижий педагогларни жалб қилган холда ўқув жараёнлари ташкил этилади.
Олий таълим муассасалари ҳамда коллеж ва техникумларнинг ўқув дастурлари АҚШ, Корея, Германия, Туркия, Сингапур ва Россия стандартлари асосида қайта кўриб чиқилади.
Тиббиётда етакчи бўлган хорижий университетлар дарслик ва илмий ишлари асосида ўзбек тилида янги авлод адабиётлари яратилади.
Талабаларни назарий ва амалий билим ҳамда кўникмаларини баҳолаш бўйича икки босқичли янги тизим жорий қилинади.
“Узлуксиз касбий таълим академияси” ташкил этиш орқали, малака ошириш ва қайта тайёрлаш тизими 11 та институт, 23 та ихтисослаштирилган марказлар, 26 та кўптармоқли клиникалар ва хусусий муассасаларда амалга ошириш йўлга қўйилади.
Маълумот учун, ўтган йили хориждан 350 нафар профессор-ўқитувчи ўқув жараёнига жалб қилинган. Шунингдек, 800 нафар шифокор Германия, Корея, Сингапур, Ҳиндистон, Саудия Арабистони, Россия, Туркия каби чет давлатларнинг нуфузли клиникалари ва университетларига малака ошириб қайтган.