ТОШКЕНТ, 31 янв — Sputnik. Пойтахт Тошкентда ҳашаротларга қарши дориларни пуллаётган сохта ходимлар пайдо бўлди. Бу ҳақда Санитария-эпидемиологик осойишталик ва жамоат саломатлиги хизмати (Санэпидхизмат) хабар берди.
Қайд этилишича, Тошкентнинг Миробод туманидаги Мовароуннаҳр маҳалласи аҳолисига ўзларини “Санитария-эпидемиологик осойишталик ва жамоат саломатлиги хизмати туман бўлими ходимимиз” дея таништириб, турли ҳашаротларга қарши дориларни пуллаётган шахслар пайдо бўлган.
Ўзини Санэпидхизмат ходимлари дея таништираётганлар фирибгарлик йўли билан келиб чиқиши номаълум дориларни сотишмоқда.
“Сохта Санэпидхизмат ходимлари Санитария-эпидемиологик осойишталик ва жамоат саломатлиги хизмати Тошкент шаҳар бошқармаси, Тошкент шаҳар Дезинфекция станцияси ва туман ҳудудий бўлимларида фаолият юритмайди”, - дейилади хабарда.
Зарарсизлантирувчи восита сотаётган шахслардан қуйидаги маълумотларни сўраш лозимлиги эслатилган:
хизмат гувоҳномаси;
қайси ташкилот ёки бошқармада фаолият юритиши;
зарарсизлантирувчи восита сотиши ва сотиб олишга асос.
Шунингдек, фуқаролардан юқоридаги важ асосида бу шахслар мурожаат қилганда Санэпидхизматнинг 78 8880101 (050) ишонч телефони, Тошкент шаҳар бошқармасининг 71 248-12-43 телефон рақами ёки Тошкент шаҳар ИИБ ва ҳудудий бўлимларига зудлик билан хабар бериш сўралган.