ТОШКЕНТ, 29 янв — Sputnik. Сурхондарё вилояти Сариосиё туманидаги "Узун" давлат ўрмон хўжалиги ҳудудида топилган қўнғир айиқ боласи Тошкент ҳайвонот боғигатопширилди. Бу ҳақда пойтахт ҳайвонот боғи матбуот хизмати хабар қилди.
Қайд этилишича, очлик сабабли айиқчанинг ҳаёти хавф остида бўлган.
“Кичкинтойнинг вазни жуда оз. Айиқлар одатда қишки уйқуга кетишдан олдин кўкламга етиб олишга имкон берувчи қалин ёғ қатламини тўплаши лозим экани инобатга олинса, айиқча омон қолмаслиги мумкин эди”, -дейилади хабарда.
Шу сабаб жонивор реабилитация марказига ўтказилган ва мутахассислар назоратига олинган. Унга қулайлик яратиш учун барча имкониятлар ишга солинмоқда.
Эслатиб ўтамиз, аввалроқ “Узун” давлат ўрмон хўжалиги ҳудудидан ёлғиз юрган бир бош айиқ боласи топилгани хабар қилинган эди. У Қизил китобига киритилган Тянь-Шань қўнғир айиқ турига мансуб.